Ragnar óttast ekki samkeppnina

Ragnar Sigurðsson, leikmaður danska meistaraliðsins FC Kaupmannahöfn, segist ekki óttast að fá samkeppni um stöðu sína í byrjunarliðinu.

Ragnar kom til FCK frá Gautaborg í sumar og fékk sæti í byrjunarliðinu eftir að Mathias Jörgensen meiddist. Nú er hann á leið til PSV í Hollandi en FCK tilkynnti í gær að Kris Stadsgaard, öflugur varnarmaður sem lék síðast með Malaga á Spáni, væri kominn til félagsins.

„Ég hef heyrt að hann sé góður leikmaður en ég hef sjálfur aldrei séð hann spila,“ sagði Ragnar við danska fjölmiðla. „Það er alltaf gott að fá samkeppni um sæti í byrjunarliðinu og ég býð hann velkominn til félagsins.“

„Maður á aldrei að vera öruggur með sæti sitt í liðinu. Það eru margir góðir leikmenn í FCK og allir vilja spila. Maður reynir bara sitt besta og svo er það þjálfarans að ákveða hverjir spila.“

Ragnar á að baki 26 leiki með FCK en landsliðsmaðurinn Sölvi Geir Ottesen leikur einnig með liðinu og er varnarmaður, rétt eins og Ragnar.