Þjálfari Gylfa fær langtímasamning

Marco Pezzaiuoli verður áfram þjálfari þýska úrvalsdeildarfélagsins Hoffenheim en hann skrifaði nýverið undir nýjan þriggja ára samning við félagið.

Pezzaiuoli tók við sem knattspyrnustjóri eftir að Ralf Rangnick hætti í síðasta mánuði. Það var Rangnick sem keypti Gylfa til félagsins frá Reading í Englandi en hann var búinn að vera stjóri liðsins í fjögur og hálft ár.

Pezzaiuoli var áður aðstoðarþjálfari Rangnick en við því starfi tók hann í sumar. Síðan hann tók við sem aðalþjálfari hefur Hoffenheim átt misjöfnu gengi að fagna. Liðið tapaði fyrir Energie Cottbus í þýsku bikarkeppninni og lék þrjá leiki í röð án þess að sigra þar til að liðið vann 1-0 sigur á Schalke um síðustu helgi.

Gylfi Þór hefur ekki verið í byrjunarliði Hoffenheim í deildarleik síðan að Pezzaiuoli tók við en hann kom inn á sem varamaður í síðustu tveimur leikjum. Gylfi hefur reyndar misst af leik vegna veikinda.

Pezzaiuoli hóf feril sinn sem leikmaður í neðri deildum Þýskalands en ákvað að hætta vegna þrálátra meiðsla ungur að aldri.

Hann hóf þjálfaraferil sinn aðeins 23 ára gamall hjá Karlsruher SC. Fyrst sem þjálfari unglingaliða en hann var einnig um tíma aðstoðarþjálfari Joachim Löw, núverandi landsliðsþjálfara Þýskalands, hjá félaginu.

Pezzaiuoli starfaði sem aðstoðarþjálfari hjá liði Suwon í Suður-Kóreu í þrjú ár en hóf svo störf hjá þýska knattspyrnusambandinu árið 2007 og þjálfaði þar yngri landslið til ársins 2010.

Hann var svo ráðinn til Hoffenheim síðastliðið sumar og verður nú knattspyrnustjóri liðsins til loka tímabilsins 2014. Pezzaiuoli 43 ára gamall.

Þess má geta að faðir Pezzaiuoli er ítalskur en móðir hans frá Hollandi. Hann er fæddur og uppalinn í Þýskalandi.