Bale fer ekki með Tottenham til Mílanó

Það eru örugglega fáir búnir að gleyma sýningu Gareth Bale í Mílanóborg fyrr á þessu tímabil en hann mun ekki endurtaka leikinn á þriðjudaginn þegar Tottenham heimsækir AC Milan í fyrri leik liðanna í sextán liða úrslitum Meistaradeildarinnar.

Harry Redknapp, stjóri Tottenham, tilkynnti það eftir 2-1 sigur Tottenham á Sunderland í ensku úrvalsdeildinni í kvöld að Gareth Bale fari ekki með Tottenham til Mílanó.

Gareth Bale er að glíma við bakmeiðsli og var ekki með í leiknum á móti Sunderland í kvöld. Hann hefur ekki spilað síðan að honum var skipt útaf eftir aðeins 11 mínútur á móti Newcastle 22. janúar síðastliðinn.

Bale skoraði eftirminnilega þrennu í 3-4 tapi Tottenham á móti Inter Milan á San Siro í riðlakeppni Meistaradeildarinnar í október. Hann hefur skorað 4 mörk og gefið 4 stoðsendingar í 6 leikjum Tottenham í Meistaradeildinni á tímabilinu.