NBA: Átta sigrar í röð hjá San Antonio Spurs

San Antonio Spurs er með besta árangurinn í NBA-deildinni í körfubolta og ætlar ekkert að gefa eftir. Liðið vann sinn áttunda sigur í röð í nótt og hefur aðeins tapað 6 af 43 leikjum sínum á tímabilinu. New Orleans Hornets vann sinn sjöunda leik í röð í nótt og bæði Boston Celtics og Los Angeles Lakers unnu sína leiki.

Tim Duncan var með 21 stig og 16 fráköst í 101-92 sigri San Antonio Spurs á New York Knicks og Tony Parker bætti við 21 stigi og 13 stoðsendingum. Þetta var 17. heimasigur Spurs-liðsins í röð og áttundi sigurinn í röð í öllum leikjum. Liðið hefur aðeins tapað sex leikjum í vetur en eitt af töpunum var á móti New York. Raymond Felton skoraði 23 stig fyrir New York sem tapaði sínum fimmta leik í röð.

Chris Paul var með 16 stig og 8 stoðsendingar í 100-59 stórsigri New Orleans Hornets á útivelli á móti Atlanta Hawks. David West og Marco Belinelli voru báðir með 15 stig hjá New Orleans. „Það er gaman að spila vörn. Það er frábært að skora en það er enn skemmtilegra að loka á lið og sjá mótherjann pirrast upp. Þegar það gerist þá veistu að liðið þitt er að spila vel saman og það er alltaf sérstök tilfinning," sagði Chris Paul.

Fimm leikmenn Los Angeles Lakers skoruðu 17 stig eða meira í 107-97 sigri á Denver Nuggets. Kobe Bryant skoraði 18 stig fyrir Lakers en Ron Artest og Pau Gasol voru stigahæstir með 19 stig. Lamar Odom var með 18 stig og Andrew Bynum skoraði 17 stig. Carmelo Anthony var með 23 stig fyrir Denver.

Kevin Garnett var með 21 stig og Paul Pierce bætti við 20 stigum þegar Boston Celtics vann öruggan 110-86 sigur á Utah Jazz. Rajon Rondo gaf 12 stoðsendingar í fimmta sigri Boston í röð og hafði betur í einvígi leikstjórnandanna því Deron Williams skoraði aðeins fimm stig. Earl Watson var stigahæstur hjá Utah með 12 stig en liðið tapaði þarna þriðja leiknum í röð.

Dwight Howard var með 31 stig og 19 frákötum í léttum 112-72 sigri Orlando Magic á Toronto Raptors. Ryan Anderson var með 21 stig fyrir Orlando og J.J. Redick skoraði 12 stig. DeMar DeRozan var með 16 stig fyrir Toronto.

Channing Frye var með 25 stig þegar Phoenix Suns vann 109-91 sigur á Washington Wizards en þetta var fimmti sigur Phoenix í röð. Steve Nash var með 17 stig og 14 stoðsendingar en nýliðinn John Wall var með 11 stig og 14 stoðsendingar hjá Washington. Nick Young var stigahæstur hjá Wizards með 25 stig en liðið hafði fyrir leikinn unnið fjóra heimaleiki í röð.

Zach Randolph var með 29 stig og 19 fráköst og Rudy Gay bætti við 22 stigum þegar Memphis Grizzlies vann 115-110 sigur á Houston Rockets. Mike Conley var með 17 stig fyrir Memphis en Kevin Martin var stigahæstur hjá Houston með 32 stig en Luis Scola skoraði 19 stig.

Brook Lopez var með 15 stig, Devin Harris skoraði 12 stig og Kris Humphries var með 11 stig og 12 fráköst þegar New Jersey Nets vann 89-74 sigur á Detroit Pistons. Tayshaun Prince var með 16 stig fyrir Detroit.

Cleveland Cavaliers tapaði sínum fimmtánda leik í röð þegar liðið lá á heimavelli á móti Milwaukee Buks. Andrew Bogut var með 23 stig í 102-88 sigri Milwaukee og Corey Maggette bætti við 20 stigum. Antawn Jamison og Ramon Sessions skoruðu báðir 22 stig fyrir Cleveland sem er aðeins með einn sigur í síðustu 26 leikjum sínum.

Monta Ellis skoraði 28 stig og tryggði Golden State Warroirs framlengingu í 119-112 sigri á Sacramento Kings. Stephen Curry var með 34 stig og David Lee bætti við 22 stigum og 10 fráköstum. Golden State vann einnig síðasta leik á móti Sacramento í framlengingu en liðið hefur nú unnið fjóra leiki í röð. Tyreke Evans skoraði 35 stig fyrir Sacramento og DeMarcus Cousins var með 21 stig.

Úrslit úr öllum leikjum í NBA-deildinni í nótt:

New Jersey Nets-Detroit Pistons 89-74

Orlando Magic-Toronto Raptors 112-72

Washington Wizards-Phoenix Suns 91-109

Atlanta Hawks-New Orleans Hornets 59-100

Boston Celtics-Utah Jazz 110-86

Cleveland Cavaliers-Milwaukee Bucks 88-102

Memphis Grizzlies-Houston Rockets 115-110

San Antonio Spurs-New York Knicks 101-92

Denver Nuggets-Los Angeles Lakers 97-107

Golden State Warriors-Sacramento Kings 119-112 (eftir framlengingu)