Lausn Icesave auðveldar afnám gjaldeyrishafta

Friðrik Már Baldursson forseti Viðskiptadeildar Háskólans í Reykjavík segir að lausn Icesave deilunnar muni auðvelda afnám gjaldeyrishaftanna, opna alþjóðlega fjármálamarkaði fyrir Íslandi og leiða til aukinnar erlendrar fjárfestingar hérlendis. Þá muni samskiptin við nágrannþjóðirnar batna.

Þetta kemur fram í grein eftir Friðrik Má sem birt er á vefsíðu ETH viðskiptaháskólans í Zürich í Sviss undir fyrirsögninni „Icesave: Groundhog Day?" Þar er Friðrik að vísa til samnefndar kvikmyndar og spyr hvort Icesave málið sé raunveruleg útgáfa af myndinni, það er íslenska þjóðin vakni upp endurtekið á sama deginum.

Friðrik Már greinir frá ferli málsins hingað til og segir að nú þegar þriðja útgáfan af Icesave-samningi sé komin til ákvörðunar sé ekki sami þrýstingur og áður á íslensk stjórnvöld að klára þetta mál. Þar að auki sé Icesave númer þrjú mun hagstæðari en fyrri samningar einkum þar sem vaxtagreiðslur eru mun minni.

Fram kemur í greininni að bresk og hollensk stjórnvöld hafi haft í hótunum eftir að Icesave eitt og tvö var hafnað, einkum um að Ísland fengi enga erlenda lánafyrirgreiðslu. Þessir þjóðir hafi síðan gefið eftir, hugsanlega vegna aðildarumsóknar Íslands að ESB.

Það hefur hinsvegar kostað Íslendinga að Icesave sé ekki afgreitt mál. Hvort sá kostnaður er meiri eða minni en nemur hagstæðari samningi nú sé óljóst, að mati Friðriks.

Friðrik telur það skynsamlegt að samþykkja þann Icesave samning sem nú liggur fyrir og honum lýst ekki vel á að vísa deilunni til dómstóla. Á þeirri leið séu augljósar og verulegar hættur sökum þess hve innistæðueigendum var mismunað með setningu neyðarlaganna á sínum tíma.