Hraðskreiðir bílar í sjöunda sinn

Hver hefði trúað því, þegar kvikmyndin The Fast and the Furious var frumsýnd fyrir tíu árum, að framhaldsmyndirnar yrðu hugsanlega sjö. En það virðist ætla að verða að veruleika enda sló fimmta myndin algjörlega í gegn, bæði hjá gagnrýnendum og hjá áhorfendum. Vin Diesel hefur staðfest að sagan fyrir sjöttu myndina hafi verið það umfangsmikil að nauðsynlegt var að klippa hana í tvennt og gera úr henni tvær myndir.

Þar með fetar Fast and the Furious-flokkurinn í fótspor bæði Twilight-seríunnar og Harry Potter-myndanna en lokakaflar þeirra beggja voru klipptir í tvennt. Handritið að lokamyndunum tveim er skrifað samtímis en hins vegar liggur ekki yfir hvort myndirnar verða gerðar hlið við hlið. Talið er líklegt að persónum Evu Mendes og Dwayne Johnson muni bregða fyrir í næstu myndum. „Í ljósi þess hversu vel síðasta mynd og mörgum persónum hefur verið bætt við varð okkur ljóst að efnið kæmist ekki fyrir í einni mynd," er haft eftir Vin Diesel sem bætir því við að þeir ætli að víkka út sjóndeildarhringinn.

Paul Walker, annar aðalleikara myndanna, bætir því við að hasarinn sé ekki það eina sem hafi lokkað fólk í kvikmyndahús. „Því myndin fjallar líka um gildi fjölskyldunnar og vináttu." Það er því ljóst að aðdáendur hraðskreiðra bíla hafa nóg að hlakka til. - fgg