Dagur Kári skiptir um lið

Baltasar Kormákur og fyrirtækið hans, Blueeyes, mun framleiða næstu kvikmynd Dags Kára Péturssonar. „Myndin er á íslensku og Dagur Kári er að skrifa handritið núna," segir Baltasar í samtali við Fréttablaðið, en hann er staddur í Frakklandi að kynna væntanlega kvikmynd sína, Djúpið.

Þetta verður fyrsta mynd Dags Kára á móðurmálinu frá því að Nói albínói sló eftirminnilega í gegn. Hann hefur í millitíðinni gert Voksne Mennesker, sem var á dönsku, og The Good Heart með þeim Brian Cox og Paul Dano í aðalhlutverkum, en hún var á ensku.

Fréttablaðið reyndi án árangurs að ná sambandi við Dag Kára í gær. Kvikmyndaleikstjórinn hefur gert sínar þrjár myndir í samstarfi við ZikZak og Þórir Snær Sigurjónsson, framleiðandi þar á bæ, segir flutninginn vera í fullri sátt.

„Ég held að hann hafi bara viljað breyta aðeins til. Og það var ekkert vandamál af okkar hálfu, við ræddum þetta bara í fullri vinsemd og engum hurðum var skellt," segir Þórir Snær. -fgg