Frægasti hafur Svíþjóðar

Gävle-hafurinn hefur verið settur upp í bænum Gävle í Svíþjóð, eins og venja er í upphafi aðventu. Hafur hefur verið reistur á aðaltorgi bæjarins ár hvert síðan 1966.

Oftar en ekki hefur verið kveikt í hafrinum áður en jólin ganga í garð. Bæði hafurinn og það að kveikja í honum eru hefðir í bænum. Brenni hann fyrir Lúsíuhátíðina 13. desember er nýr settur í staðinn.

Yfirvöld í bænum hafa gripið til ýmissa aðgerða til að reyna að koma í veg fyrir íkveikju, með misjöfnum árangri. Í fyrra var meiri öryggisgæsla en nokkru sinni fyrr í kringum hafurinn og hann þraukaði út aðventuna, þrátt fyrir að brennuvargar hafi reynt að múta öryggisvörðum. - þeb