Serranos-tvíeykið snýr sér að sterkum asískum mat

„Við horfum til mánaðamótanna nóvember/desember. Okkar hugmyndafræði gengur út á að gera hlutina vel og ef staðurinn er ekki tilbúinn færum við bara dagsetninguna,“ segir Emil Helgi Lárusson, framkvæmdastjóri íslensku skyndibitakeðjunnar Serrano.

Fyrirtækið hyggst opna nýjan veitingastað á Bíldshöfða sem hefur verið gefið nafnið Nam. Emil segir þá ætla að sjá hvernig viðtökurnar verði við fyrsta staðnum, fari allt á besta veg verði fleiri Nam-staðir opnaðir á næstu sex til tólf mánuðum.

Að sögn Emils Helga verður staðurinn byggður upp á svipaðan hátt og Serrano nema að asísk matargerð verður í fyrirrúmi. „Það verða ákveðnir kjarnaréttir og svo velurðu fyrir sjálfan þig úr borðinu,“ útskýrir Emil, en matseðill staðarins er ekki fullmótaður.

Matargerð frá Asíu hefur notið talsverða vinsælda hér á landi og Emil segist vita vel af því framboði sem í boði er. „Margir af þeim horfa hins vegar til Taílands en við ætlum okkur enn austar, til Kína, Laos og Víetnam. Sá matur er aðeins sterkari og bragðmeiri.“

Emil segir að hann og Einar Örn Einarsson, sem er hinn eigandi Serrano, hafi gengið með þennan veitingastað lengi í maganum. „Við ferðumst báðir mjög mikið og erum mikið að spá í matarmenningu og veitingastaði og þessi matarmenning hefur einfaldlega heillað okkur upp úr skónum,“ útskýrir Emil, en Einar Örn stýrir útrás Serrano í Svíþjóð þar sem staðirnir fjórir hafa notið mikilla vinsælda.

Velgengni Serrano hefur verið með miklum ólíkindum frá því að Emil og Einar Örn opnuðu fyrsta staðinn fyrir níu árum. Serrano-staðirnir eru nú orðnir sex hér á landi og fjórir í Svíþjóð. Stefnt er að því að opna fjóra staði til viðbótar hér á landi á næstu tólf mánuðum. „Við erum hins vegar ekkert orðnir ógeðslega ríkir á þessu. Þegar hrunið varð vorum við bara það heppnir að við skulduðum nánast ekki neitt og okkar mottó hefur alltaf verið að eiga fyrir því sem við gerum,“ segir Emil. „Þetta er bæði vinnan okkar og áhugamál og við höfum ótrúlega gaman af þessu, sem er bara frábært.“

freyrgigja@frettabladid.is