Messi hélt upp á Gullboltann með því að skora þrennu

Lionel Messi skoraði þrennu í 5-0 sigri Barcelona á b-deildarliðinu Real Betis í kvöld í fyrri leik liðanna í átta liða úrslitum spænska Konungsbikarnum. Messi sýndi stuðningsmönnum Barcelona Gullboltann fyrir leik og sýndi af hverju hann fékk hann í leiknum sjálfum.

Messi skoraði fyrsta markið eftir hálftíma leik þegar hann fékk boltann frá Andrés Iniesta og lyfti boltanum yfir markvörðinn. Hann skoraði annað mark sitt af harðfylgni á 62. mínútu og innsiglaði þrennuna þegar hann slapp einn í gegn ellefu mínútum síðar.

Pedro og Seydou Keita bættu síðan við mörkum og tryggðu Barcelona öruggan sigur en það ætti aðeins að vera formsatriði að spila seinni leikinn.