Michael Jordan búinn að trúlofa sig

Michael Jordan, besti körfuboltamaður sögunnar, trúlofaði sig um hátíðarnar en hann hefur verið í sambandi með Yvette Prieto, 32 ára gamallri fyrirsætu.

Þetta staðfesti talsmaður hans í samtali við bandaríska fjölmiðla í dag. Jordan er 48 ára gamall og var giftur Juanitu Jordan í sautján ár en þau skildu árið 2006.

Jordan lék í tæp nítján ár í NBA-deildinni og varð sex sinnum meistari með Chicago Bulls. Síðasta leikinn lék hann árið 2003 með Washington Wizards en er í dag meirihlutaeigandi Charlotte Bobcats.