Gylfi og félagar heppnir í bikarnum - mæta Greuther Furth

Gylfi Þór Sigurðsson og félagar í Hoffenheim höfðu heppnina með sér í dag þegar dregið var í átta liða úrslit þýska bikarsins því þeir sluppu við sterk lið eins og Bayern München, Borussia Dortmund og Borussia Monchengladbach.

Hoffenheim fékk heimaleik á móti b-deildarliðinu SpVgg Greuther Fürth en leikurinn fer fram annaðhvort 7. eða 8. febrúar 2012. Hoffenheim komst í átta liða úrslitin með því að slá út FC Augsburg en áður hafði liðið unnið Köln og Germania Windeck.

Stórleikur átta liða úrslitanna verður á milli Stuttgart og Bayern Munich en þýsku meistararnir í Borussia Dortmund dógust á móti d-deildarliðinu Holstein Kiel á útivelli. Fjórði leikurinn er síðan á milli Hertha Berlin og Borussia Monchengladbach.