Ragna í aðra umferð án þess að svitna

Ragna Ingólfsdóttir er komin áfram í aðra umferð á Bitburger Open mótinu í badminton þrátt fyrir að hafa ekki keppt í dag. Ragna átti að keppa á móti Maja Tvrdy frá Slóveníu en Tvrdy tilkynnti mínútu fyrir leikinn að hún gæfi hann sökum meiðsla.

Ragna keppti við Tvrdy í haust í Guatemala og vann þann leik léttilega, 21-5 og 21-14.  Tvrdy er í 71. sæti heimlistans en Ragna er í næsta sæti fyrir neðan, númer 72.

Ragna spilar því fyrsta leik sinn á mótinu á morgun þegar hún keppir við Tine Baun frá Danmörku.  Baun er númer 7 á heimslistanum. Ragna hefur einu sinni keppt við Baun, árið 2003 og þann leik vann Baun.