Fyrsti landsleikurinn undir stjórn Peter Öqvist í dag

Íslenska karlalandsliðið í körfubolta spilar í dag sinn fyrsta leik á Norðurlandamótinu sem fer fram í Sundsvall í Svíþjóð. Þetta er jafnframt fyrsti leikur liðsins í tæp tvö ár og fyrsti landsleikurinn undir stjórn Svíans Peter Öqvist sem tók við liðinu í sumar.

Ísland mætir heimamönnum í Svíþjóð klukkan 16.15 í dag að íslenskum tíma. Á undan mætast Finnar og Danir en Norðmenn sitja hjá fyrsta daginn.

Ísland er búið að tapa fyrir Svíum á síðustu fimm Norðurlandamótum en síðasti sigur á Svíum var á Norðurlandamótinu í Osló 8. maí 1992. Valur Ingimundarson skoraði þá 20 stig í 83-76 sigri.

Íslenska liðið er á hálfgerðum heimavelli í þessum leik því bæði þjálfarinn sem og þeir Hlynur Bæringsson og Jakob Örn Sigurðarson urðu meistarar með Sundsvall Dragons í vetur. Þess utan hefur Pavel Ermolinskij gengið til liðs við Drekana fyrir komandi tímabil. Á móti er aðeins einn leikmaður Sundsvall Dragons í sænska landsliðinu.