Hlynur pakkaði saman 214 cm miðherja í gær

Hlynur Bæringsson fór mikinn í vörn Sundsvall Dragons í gær þegar að liðið tryggði sér sænska meistaratitilinn í körfubolta.

Sundsvall vann þar með 4-3 sigur á Norrköping Dolphins í úrslitarimmu liðanna um titilinn.

Hlynur fékk það verkefni að gæta miðherja Norrköping-liðsins, hins 214 cm Joakim Kjellbom. Óhætt er að segja að það hafi tekist vel í oddaleiknum í gær þar sem að Kjellbom skoraði aðeins fjögur stig í leiknum.

„Það var mitt helsta takmark í þessari seríu - að halda honum niðri,“ sagði Hlynur í samtali við Vísi eftir leikinn í gær.

„Hann er talinn besti sænski leikmaðurinn í deildinni í dag og mig langaði svo sannarlega til að taka hann út úr leiknum.“

„Hann er sérstaklega góður að passa körfuna og við urðum því að koma honum frá henni. Ég náði að setja niður nokkra þrista og þá varð hann að elta mig. Það opnaði aðra möguleika fyrir okkur í leiknum.“

„Svo reyndi ég bara aðeins að berja á honum í vörninni. Hann er rosalega stór en ekkert mjög hraustur - fer bara að væla ef á móti blæs.“

Taktík Hlyns virkaði greinilega því Kjellbom tók ekki nema fimm skot í leiknum og aðeins eitt frákast - ótrúlegt miðað við svo hávaxinn leikmann.

Bandaríkjamaðurinn Andrew Mitchell er einnig einn af lykilmönnum Norrköping en hann er bakvörður. Hann skoraði ekki eitt einasta stig í leiknum þrátt fyrir að hafa tekið tólf skot (sjö 2ja stiga, þrjú 3ja stiga og tvö vítaköst).

Jakob Örn Sigurðarson, sem fór á kostum í gær og skoraði 31 stig, segir að það hafi verið lykilatriði að stöðva bæði hann og Kjellbom í gær.

„Við höfum oft lent í vandræðum með Norrköping þegar þeir hafa verið að spila vel og þá sérstaklega Mitchell. Þetta var í raun eini leikurinn sem við náðum að hafa almennilega stjórn á honum og mér fannst leikur þeirra riðlast við það.“

Jakob segir að Bandaríkjamaðurinn í liði Sundsvall, Alex Wesby, hafi verið með hann í strangri gæslu í gær.

„Hann var á honum allan tímann og stóð sig ótrúlega vel. Alex er örugglega einn besti Kani sem ég hef spilað með á ferlinum. Hann er rosalegur varnarmaður og spilar af hörku allan tímann. Hann er með mikið og stórt hjarta og er mjög góður körfuboltamaður.“