Sænskir fjárfestar sáu 50 milljarða gufa upp í morgun

Þeir sænsku fjárfestar sem höfðu keypt hlutabréf í lyfjafyrirtækinu Diamyd Medical máttu horfa á eftir tæplega 3 milljörðum sænskra kr. eða ríflega 50 milljörðum kr., gufa upp í morgun.

Hlutabréf í Diamyd Medical féllu um 83,4% fyrir hádegið á markaðinum í Stokkhólmi. Ástæðan var að lyf gegn sykursýki, sem einnig ber nafnið Diamyd, sem fyrirtækið hefur verið að þróa síðustu 17 árin reyndist ekki virka gegn sykursýki í prófunum.

Við lokun markaða s.l. föstudag var markaðsverðmæti Diamyd Medical 3,4 milljarðar sænskra kr. Eftir „blóðbaðið“ í morgun er markaðsverðmætið hrunið niður í rúmlega 568 milljónir sænskra kr.

Þróunin á sykursýkilyfinu Diamyd hefur hingað til kostað fyrirtækið um hálfan milljarð sænskra kr. Í frétt um málið í Berlingske Tidende segir að forráðamenn Diamyd Medical hafi þó ekki gefist upp á lyfinu og ætli að halda áfram að þróa það og prófa.