Hamilton og Button telja áhugavert mót framundan í Tyrklandi

Næsta Formúlu 1 mót er um aðra helgi í Tyrklandi og sigurvegari þess móts í fyrra var Lewis Hamilton hjá McLaren. Hann vann einnig síðustu keppni þessa árs, sem var í Kína.

Hamilton segir m.a. í fréttatilkynningu frá McLaren að mótið í Tyrklandi verði áhugavert og spennandi eins og síðustu mót, en hann er meðal kappa sem eru komnir í stigaslag við Sebastian Vettel hvað titil ökumanna varðar.

Vettel er með 68 stig í stigamótinu, Hamilton 47 og liðsfélagi hans, Jenson Button 38, en fyrir aftan er Mark Webber með 37. Fernando Alonso er fimmti með 26 stig. Vettel vann tvö fyrstu mót ársins, í Ástralíu og Malasíu en Hamilton það þriðja í Kína.

Fjórða mótshald ársins er dagana 6.-8. maí í Tyrklandi og kappaksturinn á sunnudegi að venju.

„Ég vann þetta mót í fyrra og Istanbúl Park er braut sem ég nýt mín á. Nútímaleg braut, með fjölbreytilegar beygjur og fullt af háhraða svæðum og staður þar sem maður finnur fyrir því ef bíllinn er vel upp settur", sagði Hamilton.

„Það tala allir um beygju átta, sem er frábær beygja, en ég elska að bremsa seint inn í beygju níu og tólf. Það er hægt að nálgast þær hratt og að ná þeim vel gefur góða tilfinningu. Ég tel að ökumenn muni vinna að því hörðum höndum að passa upp á dekkin í beygju átta, sem er hröð og mishæðótt. Beygja sem reynir hvað mest á dekkin á tímabilinu", sagði Hamilton.

Þá segir hann að KERS kerfið verið mikill kostur í mótinu í Tyrklandi.

„Flestir beinu kaflarnir eru eftir hægar beygjur og það eru fjöldi tækifæra til að nota KERS kerfið, mest út úr tíundu beygju og líka eftir lokabeygjuna. Það eru góð tækifæri til að komast framúr inn í tólftu beygjuna, þar sem hægt er að elta bílinn á undan út úr beygju tíu", sagði Hamilton.

Button segir að dekkjamálin verði mikilvæg í Tyrklandi og muni ráða miklu um keppnisáætlun liðanna.

„Það verður mikilvægt að nýta dekkin á réttan hátt og það er líklegt til að ráða hvenær og hve oft við tökum þjónustuhlé í mótinu. Það eru líka líkur á því að veðrið verði kaldara en vaninn er í Tyrklandi, þar sem það fer fram þremur vikur fyrr en í fyrra. Það gæti haft áhrif á dekkin. Þetta verður áhugavert mót", sagði Button.