Ancelotti: Þurfum að bíða eftir Torres

Carlo Ancelotti segir að Manchester United hafi átt skilið að fara áfram í undanúrslit Meistaradeildar Evrópu en United vann í kvöld 2-1 sigur á Chelsea í fjórðungsúrslitum keppninnar og 3-1 samanlagt.

„Við stóðum okkur ekki illa en þegar báðir leikirnir eru skoðaðir átti United skilið að fara áfram,“ sagði Ancelotti sem þykir nú ansi valtur í sessi enda langþráður draumur Roman Abramovich, eiganda Chelsea, að vinna Meistaradeildina.

Chelsea byrjaði betur en það var United sem komst yfir með marki Javier Hernandez í lok fyrri hálfleiks. Didier Drogba byrjaði á bekknum en kom inn á fyrir Fernando Torres í hálfleik. Drogba jafnaði metin á 77. mínútu en Ji-Sung Park tryggði United sigur með marki á sömu mínútu.

„Leikurinn var í jafnvægi allt til loka þó svo að við hefðum verið með tíu leikmenn inn á vellinum þegar honum lauk,“ sagði Ancelotti en Ramires fékk að líta rauða spjaldið þegar 20 mínútur voru eftir af leiknum.

„Við vorum með góða stjórn á leiknum fyrstu 25 mínúturnar en náðum ekki að skora. Við fengum þó tækifæri til þess. Svo náðu þeir að skora sem gerði þetta erfiðara fyrir okkur.“

„Drogba átti frábæran síðari hálfleik og sýndi mikinn styrk og hæfni þegar hann skoraði markið. Við náðum að koma til baka manni færri en það reyndist ekki nóg.“

Hann vildi ekki gagnrýna Fernando Torres sem hefur nú ekki skorað í ellefu leikjum með Chelsea - eða síðan hann var keyptur frá Liverpool fyrir 50 milljónir punda í janúar.

„Við verðum að halda í trúna og bíða og sjá hvort að hann muni bæta sig.“