Ronaldo vill spila þó svo læknarnir vilji það ekki

Stjörnurnar í liðum Real Madrid og Tottenham eru að skríða saman fyrir leik liðanna í Meistaradeildinni annað kvöld. Við greindum frá því í morgun að Gareth Bale muni hugsanlega spila og nú segist Cristiano Ronaldo hjá Real vera klár í bátana.

Jose Mourinho, þjálfari Real, var búinn að afskrifa Ronaldo fyrir leikinn en nú hefur það kvisast út að Ronaldo hafi tjáð þjálfaranum að hann geti spilað.

Ef Ronaldo spilar þá verður hann væntanlega sprautaður fyrir leik en læknateymi Madridarliðsins vill alls ekki að hann spili. Áhættan er of mikil að þeirra mati. Svo mikil að Ronaldo geti borið mikinn skaða af og hugsanlega orðið lengi frá.

Mourinho þarf því að velta málinu vel fyrir sér en umhugsunartíminn er ekki langur.