Anton Sveinn bætti 22 ára gamalt Íslandsmet

Ægiringarnir Anton Sveinn Mckee og Eygló Ósk Gústafsdóttir settu bæði Íslandsmet á sterku sundmóti í Stokkhólmi um helgina. Eygló Ósk bætti sitt eigið met í 200 metra baksundi en Anton Sveinn bætti 22 ára gamalt met Ægiringsins Ragnars Guðmundssonar í 800 metra skriðsundi.

Eygló synti 200 metra baksund á 2:17,83 mínútum en gamla metið hennar var ekki nema hálfsmánaðargamalt en þá synti Eygló á 2:17,88 mínútum. Hún bætti því metið sitt um fimm hundraðshluta úr sekúndu.

Anton Sveinn synti 800 metra skriðsund á tímanum 8:24,54 mínútum en gamla metið hans Ragnars var sett í Bonn árið 1989 var 8:28,28 mínútur. Anton bætti því metið um rúmar þrjár sekúndur.