Schalke hafði betur gegn Valencia og komst í 8-liða úrslit

Schalke tryggði sér í kvöld sæti í 8-liða úrslitum Meistaradeildar Evrópu með 3-1 sigri á heimavelli í Þýskalandi gegn Valencia frá Spáni. Samanlagt sigraði Schalke 4-2 en Farfán gerði út um vonir Valencia með marki á lokamínútunni en Valencia sótt af krafti á lokakaflanum.

Farfán skoraði tvívegis fyrir Schalke en Gavronovic skoraði annað mark Schalke á 52. mínútu. Richardo Costa kom Valencia yfir á 17. mínútu.

Tottenham frá Englandi, Barcelona frá Spáni og Shaktar Donetzk frá Úkraínu eru einnig komin í 8-liða úrslit keppninnar.

Á þriðjudaginn í næstu viku mætast Manchester United frá Englandi og Marseille frá Frakklandi. Bayern München frá Þýskalandi tekur á móti Inter en ítalska liðið hefur titil að verja.