Lyon og Real Madrid gerðu 1-1 jafntefli í Frakklandi

Súperskipting Jose Mourinho virtist vera að létta Lyon-álögunum af Real Madrid en Frakkarnir náðu að tryggja sér 1-1 jafntefli átta mínútum fyrir leikslok í fyrri leik liðanna í sextán liða úrslitum Meistaradeildarinnar í kvöld. Varamaðurinn Karim Benzema kom Real yfir á móti sínum gömlu félögum en Bafetimbi Gomis skoraði jöfnunarmark Lyon.

Lyon átti besta færið í rólegum fyrri hálfleik en Real Madrid menn mættu miklu grimmari til leiks í þeim seinni eftir væntanlega góða hálfleiksræðu frá þjálfara sínum Jose Mourinho. Cristiano Ronaldo skaut meðal annars í stöngina úr aukaspyrnu og skömmu síðar skallaði Sergio Ramos í slána.

Real Madrid komst hinsvegar ekki yfir fyrr en að Mourinho var búinn að skipta Karim Benzema inn á fyrir Emmanuel Adebayor.  Benzema var ekki búinn að vera inn á vellinum nema í eina mínútu þegar hann kom Real Madrid í 1-0 á 65. mínútu. Mesut Ozil og Cristiano Ronaldo léku þá vel saman og spiluðu Benzema frían í teignum.

Claude Puel gerði í kjölfarið þrjár skiptingar á liði sínu og það virtist hafa góð áhrif því Bafetimbi Gomis jafnaði leikinn átta mínútum fyrir leikslok. Markið kom eftir aukaspyrnu sem Cris skallaði fyrir fætur Gomis.