Leonardo segist ekki vera undir pressu

Brasilíumaðurinn Leonardo mun stýra Inter í fyrsta skipti í Meistaradeildinni í kvöld er liðið mætir FC Bayern. Þarna mætast liðin sem spiluðu til úrslita í keppninni á síðustu leiktíð.

"Mér finnst ég ekki vera undir neinni sérstakri pressu fyrir þennan leik. Maður fær samt alltaf léttan sting fyrir Meistaradeildarleiki," sagði Leonardo en kollegi hans hjá Bayern hefur skotið fast á leikstíl Inter sem hann segir vera leiðinlegan.

"Ég óttast ekkert enda er mitt lið sigurvegarinn í þessari keppni. Ég fagnaði þegar Inter vann keppnina á síðustu leiktíð."