Redknapp: Ekki hægt að finna betri vinstri vængmann í heiminum

„Við vorum komnir í mikil vandræði þegar við vorum lentir 4-0 undir og þetta hefði getað endað mjög illa. Við hefðum alveg getað endað með sjö, átta eða níu marka tap með tíu menn á móti Inter Milan," sagði Harry Redknapp, stjóri Tottenham eftir 3-4 tap liðsins á móti Inter í Meistaradeildinni í kvöld.

„Ég væri að ljúga ef ég segið að ég hefði séð þessa lokastöðu fyrir mér í hálfleik. Við náðum að nýta okka möguleika mjög vel í seinni hálfleiknum," sagði Redknapp en Tottenham vann seinni hálfleikinn 3-0 þrátt fyrir að leika manni færri.

„Ég var með tvo vinstri vængmenn inn á vellinum og við áttum alltaf möguleika. Þetta var frábær þrenna hjá Gareth Bale og enn ein stórkostlega frammistaðan hjá honum á tímabilinu," sagði Redknapp.

„Það er ekki hægt að finna betri vinstri vængmann í heiminum og það eru öruggleg ekki margir leikmenn í heiminum betri en hann á þessari stundu," sagði Redknapp um hinn magnaða Gareth Bale.

„Gareth Bale er ekki til sölu. Hann er í okkar félagi og við ætlum að byggja upp lið Tottenham en ekki leysa það upp," sagði Redknapp að lokum.