Huntelaar og Jurado til Schalke

Hollenski sóknarmaðurinn Klaas-Jan Huntelaar er búinn að finna sér lið. Hann yfirgefur AC Milan og heldur til Schalke í Þýskalandi.

Huntelaar var orðaður við enska úrvalsdeildarliðið Tottenham en það var á endanum Schalke sem krækti í þennan 27 ára leikmann.

„Ég vildi vera áfram hjá AC Milan en eftir að Zlatan Ibrahimovic var keyptur til félagsins fannst mér ekki vera pláss fyrir mig," sagði Huntelaar.

Schalke ætlar sér stóra hluti og hefur einnig keypt miðjumanninn spænska Jose Jurado frá Atletico Madrid. Þessi 24 ára leikmaður á fjölmarga leiki að baki fyrir yngri landslið Spánar.