Kári Steinn með Íslandsmet í 5000 metra hlaupi á Áramóti Fjölnis

Blikinn Kári Steinn Karlsson setti nýtt Íslandsmet innanhúss í 5000 metra hlaupi á fjölmennu Áramóti Fjölnis sem fór fram í gærkvöldi. Kári Steinn bætti tveggja ára gamalt met Blikans Stefáns Guðmundssonar um rúmar 27 sekúndur. Þetta kemur fram á heimasíðu Frjálsiþróttasambandsins.

Kári Steinn hljóp 5000 metrana á 14:50,37 mínútum en gamla metið hans Stefáns var 15:17,82 mínútur en hann setti það árið 2008. Kári á einnig Íslandsmetið í 3000 metra hlaupi innanhúss sem og Íslandsmetin í 5000 og 10000 metra hlaupum utanhúss.

Það voru fleiri met sett á mótinu í gær. Bjarki Gíslason úr UFA stökk 4,81 metra í Stangarstökki og bætti met í ungkarlaflokki 19-22 ára, en hann tók þar nokkurra daga gamalt met af Einari Daða Lárussyni ÍR sem hafði stokkið 4,70 metra.

Hilmar Örn Jónsson úr ÍR kastaði síðan 3 kílóa kúlunni 18,47 metra og bætti metið í piltaflokki, en það var 18,32 metrar og hafði verið sett af Vigfúsi Dan Jónssyni árið 1997.

Ólafur Einar Skúlason, Ármanni bætti sig í hástökki og bætti vallarmetið í Laugardalshöllinni þegar hann vippaði sér yfir 2,00 metra.

Þorsteinn Ingvarsson, HSÞ Stökk 7,49 metra í langstökki karla og var aðeins 3 sentimetrum frá meti í ungkarlaflokki. Hann hefur aldrei stokkið jafnlangt innanhúss.

Arna Stefanía Guðmundsdóttir úr ÍR vann 300 metra hlaup kvenna á tímanum 40,04 sekúndum og vann með því besta afrek mótsins því hún hlaut 1023 stig fyrir þetta hlaup. Þetta er annar besti tími innanhúss hjá konum í þessari vegalengd. Þetta er besti tími í flokki meyja, stúlkna og ungkvenna 19-20 ára, en það er ekki skráð met í þessum flokki skv. skrá FRÍ.

Aníta Hinriksdóttir úr ÍR bætti sinn besta tíma í 800 metra hlaupi er hún kom í mark aðeins 6/100 frá gildandi meti í hennar aldursflokki eða á 2:18,10 mínútum en metið er 2:18,04 mínútur sem Stefanía Valdimarsdóttir á.