Van Gaal: Sendum skýr skilaboð

Louis van Gaal, þjálfari Bayern München, segir að sínir menn hafi sent andstæðingum sínum skýr skilaboð með sigrinum á Lyon í kvöld.

Bayern vann nauman sigur, 1-0, þrátt fyrir að hafa misst Franck Ribery af velli með rautt spjald. Arjen Robben skoraði eina mark leiksins með þrumufleyg á 69. mínútu.

Jeremy Toulalan, leikmaður Lyon, var þá fokinn af velli með rautt og því jafnt í liðunum.

„Ég er mjög ánægður. Ég held að við sýndum Evrópu í kvöld hversu sterkir við erum," sagði van Gaal.

„Ég átti ekki von á því að við myndum ná að vinna 1-0 eftir að Ribery var rekinn út af en við stjórnuðum leiknum, jafnvel þegar við vorum einum færri."

„Við sköpuðum mörg færi en skoruðum eitt mark. Það var gott."