Dönsk landbúnaðarbóla líklega komin á steypirinn

12. janúar 2010 11:12

Danskur landbúnaður er nú orðinn svo skuldsettur að embættismenn stjórnvalda þar í landið segja stöðuna ekki geta gengið lengur. Þetta kemur fram í minnisatriðum sem Lene Espersen efnahags- og viðskiptaráðherra Danmerkur hefur tekið saman.

Þetta kemur fram í frétt í Jyllands Posten undir fyrirsögninni. „Landbúnaðurinn gæti orðið næsta bólan sem brestur". Espersen mun funda um málið í dag með fulltrúum þeirra stjórnmálaflokka sem stóðu á bakvið bankpakke II, aðstoð stjórnvalda við dönsku bankanna. Á fundinum verður skuldavandi landbúnaðarins til umræðu og áhrif hans á rekstur dönsku bankanna.

Í minnisatriðunum kemur fram að þótt dönsku bankarnir ráði við kreppu í landbúnaðinum í augnblikinu sé nauðsynlegt að fjármálaeftirlit landsins fylgist náið með framvindu mála í nokkrum af bönkunum.

Alls eru 1.450 danskar bújarðir í miklum vandræðum vegna mikilla skulda og lítillar framleiðni. Þar af er um 650 svínaframleiðendur að ræða, 650 mjólkurframleiðendur og 150 garðyrkjuframleiðendur.

Fram kemur í fréttinni að margir danskir bændur geti haldið rekstri sínum áfram í krafti sögulega lágra vaxta. Hinsvegar búast allir við að vextir fari hækkandi og að slíkt muni hafa alvarlegar afleiðingar í för með sér fyrir danska landbúnað.