Hrein­gerninga­fyrir­tæki brýtur blað í fræðslu­málum

„Við erum svo stolt af þessum árangri sem við höfum markvisst unnið að undanfarin ár og lítum á þetta sem sönnun á því að fræðsla sé fjárfesting í fólki og hefur beinan rekstrarlegan ávinning,“ segir Dagbjört Una Helgadóttir, sviðsstjóri mannauðs hjá AÞ-Þrif.

AÞ-Þrif er hreingerningafyrirtæki sem tók til starfa 2006 og fagnar því 20 ára afmæli sínu í ár. Fyrirtækið býður upp á alhliða þjónustu þegar kemur að þrifum fyrir fyrirtæki, stofnanir og einstaklinga. Hjá fyrirtækinu starfa um 230 manns og hefur fyrirtækið fest sig í sessi sem eitt öflugasta hreingerningafyrirtæki landsins.

Dagbjört segir að eigendur og starfsfólk fyrirtækisins sé afar hreykið af þessum árangri en hann megi rekja til mikils viðsnúnings sem tekinn var í fræðslumálum fyrirtækisins í upphafi árs 2024 en þá var ákveðið að stækka mannauðssviðið og leggja áherslu á fræðslumál.

Fræðsla miðuð við ólíkar hæfniþarfir

Flestir millistjórnendur AÞ-Þrif eru innanhússráðningar „Í þessum hópi má finna góða verklega kunnáttu í þrifum og vildum við búa til formlega menntun sem hentaði starfinu. Við sérhönnuðum Þjónustustjóraskóla fyrir þennan hóp í samstarfi við Háskólann á Bifröst. Um er að ræða fyrstu námsleiðina á Íslandi sem er sérhönnuð fyrir þennan hóp af starfsfólki sem þó má finna í flestum þjónustufyrirtækjum hér á landi. Námsleiðin getur því nýst talsverðum hluta af íslenskum vinnumarkaði í framtíðinni.“

Allir þjónustustjórar AÞ-Þrifa útskrifast í mars en Þjónustustjóraskólinn verður einnig í boði fyrir almenna starfsmenn sem vilja þróast í starfi segir Dagbjört. „Þetta er fyrsta skrefið til að ná því markmiði að öllu starfsfólki standi til boða leið til að þróast í starfi. Á þessu ári hefst einnig flokk- og verkstjóraskóli í samstarfi við Bifröst sem er ætlaður þeim störfum sem eru á milli þjónustustjóra og framlínufólks.“

Einnig býður AÞ-Þrif upp á fjölbreytta fræðslu sem er sniðin eftir starfi starfsfólks en um leið er lögð áhersla á fræðslu sem er ætluð að styrkja fólk almennt á íslenskum vinnumarkaði, óháð starfi sínu hjá fyrirtækinu. „Við lítum á þennan flokk sem hluta af samfélagslegri ábyrgð fyrirtækisins. Hér má nefna sem dæmi fræðslu í að skilja launaseðla, íslenskukennslu, námskeið sem snúa að andlegri líðan og boð í verk- og flokkstjóraskólann. Í ljósi þess að allt að fjórðungur starfsfólks á íslenskum vinnumarkaði er af erlendum uppruna og meirihluta starfsfólks okkar er það líka, þá finnst okkur mikilvægt að vinnuveitendur finni farsæla lausn á fræðsluþörfum þessa hóps.“

AÞ-Þrif er eina íslenska fyrirtækið með þjálfaða og vottaða starfsmenn í gagnaversþrifum. „Við sóttum fræðslu erlendis frá til þess að láta votta fyrirtækið og sækja vottaða fræðslu fyrir okkar starfsfólk. Þetta er dæmi um hvernig fræðsluáætlun ársins þarf að þróast í takt við viðskiptavini og vinnumarkaðinn.“

Mælingar sýna frábæran árangur

Dagbjört segir fjölmargar mælingar sýna fram á frábæran árangur í fræðslu hjá AÞ-Þrif. Yfirgnæfandi meirihluti starfsfólks upplifði að þeim hefði verið boðin fræðsla sem hjálpaði þeim og/eða nýttist í starfi. En jákvæð áhrif fræðslu má einnig sjá í ýmsum lykilmælikvörðum mannauðsmála og rekstrar. „Frá 2023 lækkaði veikindaprósenta um heilt prósentustig, starfsmannavelta um 32%, starfsánægja hækkaði um 10% og rekstrarhagnaður hefur aukist.“

Hún segir því niðurstöður sýna með skýrum hætti að fræðsla hjá AÞ-Þrif er ekki bara kostnaður. „Fræðslan er fjárfesting sem skilar sér í aukinni hæfni, fagmennsku, betri líðan og beinum rekstrarlegum ávinningi.“