Nýjasta gælunafn O´Neal: Shaq-a-Claus

Það eru fáir betri því að stela sviðsljósinu en NBA-körfuboltamaðurinn Shaquille O'Neal sem hefur byrjað frábærlega með Boston Celtics í vetur. Shaquille hefur brugðið sér í allra kvikinda líka á löngum og farsælum ferli og nú ætlar hann að gleðja unga Boston-búa fyrir jólin.

Shaquille O'Neal er búinn að skora 11,3 stig og taka 6,5 fráköst að meðaltali í 15 fyrstu leikjum sínum með Boston en hann er búinn að hitta úr 68,4 prósent skotum sínum sem eru flest troðslur eða skot í kringum körfuna.

O'Neal tók þátt í verkefninu "Toys for Tots" á dögunum þar sem fólk sameinast um að gefa jólagjafir til barna sem eiga ekki von á gjöfum um þessi jól vegna fáttæktar foreldra sinna. Hann ætlar einnig að gleðja börn fram að jólum í nýjasta gervi sínu sem jólasveinn.

Shaquille O'Neal hefur nú í tilefni hólanna skýrt sjálfan sig Shaq-a-Claus en þetta er ekki fyrsta viðurnefnið sem þessi 216 sm og 147 kílóa maður gefur sjálfum sér.

Hér á eftir fara nokkur önnur: "Shaq", "The Diesel", "Shaq Fu", "The Big Aristotle", "The Big Daddy", "Superman", "The Big Agave", "The Big Cactus", "The Big Shaqtus", "The Big Galactus", "Wilt Chamberneezy", "The Big Baryshnikov", "The Real Deal", "Dr. Shaq", "The Big Shamrock", "The Big Leprechaun" og "Shaqovic..

Shaq-a-Claus mun síðan vera aðalmaðurinn í hátíðarveislu fyrir Roxbury-barnaklúbbinn í kvöld þar sem hann mun mæta í hinum dæmigerða jólasveinabúning með einni undantekningu því hann ætlar líka að klæðast einum hanska til heiðurs Michael Jackson og dansa síðan Jackson-dansa með börnunum.

Það er nefnilega enginn eins og Shaquille O'Neal öðru nafni Shaq-a-Claus.