Steve Nash eignaðist barn og tilkynnti um skilnað á sama deginum

Steve Nash og kona hans Alejandra Nash eignuðust sitt annað barn um helgina en það kom flatt upp á marga að um leið tilkynnti þessi snjalli leikstjórnandi Phoenix Suns að hjónin væru að skilja eftir fimm ára hjónbarn.

Alejandra og Steve eiga saman sex ára tvíburadætur, Lola og Bellu, en eignuðust soninn Matteo Joel Nash á föstudaginn. Þau hafa víst búið í sitthvoru húsinu undanfarna mánuði.

„Ég þakklátur og spenntur yfir því að hafa eignast soninn, Matteo Nash. Alejandra og barninu líður vel en þetta er súrsæt stund fyrir mig og konuna mína því við erum að skilja eftir fimm ára hjónaband," sagði Steve Nash í tilkynningu sem birt var í Life & Style blaðinu.

Steve Nash sagði að hann og verðandi fyrrverandi kona hans ætli að gera allt til þess að börnin fái tækifæri til að vaxa og dafna og njóta ástar þeirra beggja á meðan fjölskyldan fer í gegnum þessa erfiðu tíma.

Steve Nash hefur átt tvo mjög góða leiki eftir að sonuruinn kom í heiminn. Hann var með 28 stig og 14 stoðsendingar í sigri á Sacramento og fylgdi því eftir með að skora 21 stig og gefa 13 stoðsendingar í sigri á NBA-meisturum Los Angeles á þeirra eigin heimavelli. Nash hitti úr 19 af 29 skotum sínum í þessum tveimur leikjum og tapaði aðeins 2 boltum.