Drogba: Erfitt að spila þennan leik

Didier Drogba snéri á sinn gamla heimavöll í kvöld er Chelsea sótti Marseille heim. Franska liðið vann góðan heimasigur og Drogba var ekki kátur eftir leikinn þó svo hann hafi fengið góðar móttökur hjá stuðningsmönnum Marseille.

"Það hafði mikil áhrif á mig að fá þessar móttökur. Ég var djúpt snortinn yfir þessum ótrúlegu móttökum. Það var erfitt fyrir mig að spila þennan leik en ég er mjög vonsvikinn yfir úrslitunum," sagði Drogba svekktur.

Chelsea vildi fá víti á 15. mínútu leiksins er Malouda var tekinn niður í teignum eins og sjá má á myndinni hér að ofan.

"Hann dæmdi víti og sagði síðan að Florent hefði kastað sér niður. Þetta breytti leiknum. 1-0 fyrir okkur hefði breytt leiknum. Ég vildi skora úr þessu víti."