Dísætt með kalkúninum

Þegar Selma Rut Þorsteinsdóttir fór að velta fyrir sér hvernig hún gæti lokkað börnin sín til að borða meðlæti um jólin rakst hún á dísæta uppskrift að sætum kartöflum á netinu.

„Okkur datt í hug að sykur­púðarnir myndu vekja mikla lukku meðal barnanna," segir Selma Rut Þorsteinsdóttir.

„Við fórum á netið og rákumst á þessa uppskrift, sem er bandarísk og því venjulega notuð sem meðlæti með kalkún, en hún er líka góð með öllum hátíðamat," segir hún og lýsir réttinum frekar: „Þetta eru sætar kartöflur sem eru látnar malla í púðursykurbráðningi með sykurpúðum. Síðan eru kartöflurnar settar í eldfast mót, sykur­púðum raðað yfir og grillað í ofninum," segir hún. Þessi dísæti réttur er orðinn hluti af jólahefðinni á heimili Selmu, sem á tvö börn og á von á sínu þriðja rétt eftir jól.

Selma hefur mjög gaman af jólunum og öllu sem þeim tengist. „Ég elska hefðir og að búa til mínar eigin hefðir og siði með krökkunum," segir Selma, sem hóf jóla­undirbúninginn í ár líkt og áður á því að gefa jól í skókassa.

Hið dísæta meðlæti hentar vel með kalkún enda er uppskriftin af bandarískum uppruna. Uppskriftin sem Selma gefur er um helmingur af því sem sjá má á myndinni hér fyrir neðan.- sg

Fyrir 6 (tekur um það bil 40 mínútur að matreiða).

1 kg sætar kartöflur

150 g smjör

100 g púðursykur

100 g sykurpúðar (má bæta ofan á eldfasta mótið eftir smekk)

kanill og múskat eftir smekk

Hitið ofn í 200 g og smyrjið eldfast mót. Sjóðið kartöflur í um fimmtán mínútur og flysjið.

Hitið smjör, púður­sykur og tvo bolla af sykur­púðum ásamt kanil og múskati á meðalhita í potti þar til sykurpúðarnir hafa bráðnað.

Skerið kartöflurnar aðeins niður, bætið þeim út í sykurbráðina og merjið þær saman við (það er allt í lagi að skilja eftir einhverja stærri bita).

Hellið síðan kartöflunum í eldfasta mótið og bakið í tíu mínútur, takið mótið þá út, raðið afganginum af sykur­púðunum yfir og bakið aftur þar til sykurpúðarnir eru farnir að gyllast.

Berið fram og njótið.