Ásdís Hjálmsdóttir valin Íþróttamaður Reykjavíkur

Ásdís Hjálmsdóttir frjálsíþróttakona úr Ármanni var í dag valinn íþróttamaður Reykjavíkur fyrir árið 2009 en þetta er í 31. sinn sem Íþróttamaður Reykjavíkur er kjörinn.

Ásdís fékk auk bikarsins 150 þúsund króna styrk frá ÍBR. Ásdís setti nýtt Íslandsmet í spjótkasti, 61,37 m, í byrjun maí 2009 og komst þá í sjöunda sæti heimslistans.

Ásdís er nú í 22. sæti á heimslistanum en hún hækkaði sig um fjórtán sæti frá því í fyrra og engin Norðurlandabúi var ofar en hún á listanum.

Tíu aðrir reykvískir íþróttamenn fengu 50 þúsund króna styrk en alls var útdeilt úr afrekssjóði borgarinnar 7,7 milljónum króna til íþróttafélaga og deilda í borginni.

Valur fékk hæstu upphæðina eina milljón og 450 þúsund en KR-ingar næst hæstu fjárhæðina 1 milljón og 350 þúsund krónur.

Stjórn Íþróttabandalags Reykjavíkur hefur undanfarin ár veitt viðurkenningar til íþróttamanna í reykvíkskum félögum fyrir frábæran árangur. Að þessu sinni voru það ellefu íþróttamenn sem hlutu viðurkenningu og hlaut hver þeirra styrk að upphæð kr. 50.000,-. Íþróttamennirnir níu eru eftirfarandi:

1. Anna Soffía Víkingsdóttir, júdókona úr Ármanni

2. Ásdís Hjálmsdóttir, frjálsíþróttakona úr Ármanni.

3. Ásgeir Sigurgeirsson, skotíþróttamaður úr Skotfélagi Reykjavíkur.

4. Eyþór Þrastarson, sundmaður úr Íþróttafélagi fatlaðra í Reykjavík.

5. Guðmundur Stephensen, borðtennismaður úr Víkingi.

6. Helga Margrét Þorsteinsdóttir, frjálsíþróttakona úr Ármanni.

7. Jakob Jóhann Sveinsson, sundmaður úr Sundfélaginu Ægi.

8. Katrín Jónsdóttir, knattspyrnukona úr Knattspyrnufélaginu Val.

9.Ragnheiður Ragnarsdóttir, sundkona úr Knattspyrnufélagi Reykjavíkur.

10.Sonja Sigurðardóttir, sundkona úr Íþróttafélagi fatlaðra í Reykjavík.

11. Þormóður Jónsson júdómaður úr Júdófélagi Reykjavíkur.