Ancelotti lofaði Anelka

Carlo Ancelotti, stjóri Chelsea, hrósaði Nicolas Anelka mikið eftir 4-1 sigur liðsins á MSK Zilina í Slóvakíu í F-riðli Meistaradeildar Evrópu í kvöld.

„Allir leikir í Meistaradeildinni eru erfiðir," sagði Ancelotti en Chelsea komst í 4-0 á fyrstu 48 mínútum leiksins í kvöld. „Við byrjuðum mjög vel í fyrri hálfleik og spiluðum frábæra knattspyrnu. Leikurinn var öðruvísi í seinni hálfleik."

„Zilina setti meiri pressu á vörnina okkar. Varnarlínan okkar hélt vel í leiknum og það er eðlilegt að lenda í vandræðum þegar maður er 3-0 yfir."

„En lykillinn að sigrinum var frammistaða Anelka. Hann spilaði frábærlega í kvöld. Hann var duglegur að finna sér svæði og skapa sér færi."

„Ef ég á að dæma frammistöðu liðsins verð ég að vera mjög ánægður því það er ekki auðvelt að vinna 4-1 á útivelli í Meistaradeildinni," sagði Ancelotti.