Eyþór lenti í fimmta sæti

Nú síðdegis keppti Eyþór Þrastarson í úrslitum á HM fatlaðra í 400 m skriðsundi í flokki blindra (S11). Hafnaði Eyþór í 5. sæti, synti á tímanum 5:08.02 mín.

Fjórir fyrstu í þessu úrslitasundi syntu undir fimm mínútum þar sem hinn spænski Enhamed Mohamed sigraði á tímanum 4:44.08 mín.

Á morgun, sem er síðasti keppnisdagur mótsins, synda þau Eyþór Þrastarson í 100 m baksundi flokki S11 (flokki blindra), Sonja Sigurðardóttir og Hjörtur Már Ingvarsson í 100 m skriðsundi flokki S5 (flokki hreyfihamlaðra) og Jón Margeir Sverrison, Rangar Ingi Magnússon, Aníta Ósk Hrafnsdóttir og Kolbrún Alda Stefánsdóttir í 200 m skriðsundi í flokki S14 (flokki þroskaheftra).

Mótinu lýkur svo næstkomandi laugardag með keppni í 5 km sjósundi, grein sem nýlega er farið að bjóða upp á í tengslum við stærstu sundmótin sem IPC (Alþjóðaólympíuhreyfing fatlaðra) stendur fyrir.