Ribery vill ekki missa Schweinsteiger

Frakkinn Franck Ribery hefur hvatt félaga sinn hjá FC Bayern, Bastian Schweinsteiger, til þess að skrifa undir nýjan samning hið fyrsta. Ribery vill að Schweini skuldbindi sig hjá félaginu til 2015 hið minnsta.

"Ég vona svo innilega að hann skrifi undir samning til 2015 rétt eins og ég gerði. Við erum fínir félagar og leikmenn eins og hann eru mikilvægir fyrir félagið," sagði Ribery sem lengi vel var orðaður við Real Madrid.

Núverandi samningur Schweinsteiger við félagið rennur út árið 2012 og hann hefur ekki enn fengist til þess að skrifa undir nýjan samning.

Á meðan staðan er þannig verður hann áfram orðaður við Man. Utd, Chelsea og Real Madrid.