Þjálfari Barcelona við dómarana: Passið upp á Messi

Pep Guardiola, þjálfari Barcelona, hefur miklar áhyggjur af þeim hörðu tæklingum sem Argentínumaðurinn frábæri, Lionel Messi, verður fyrir í leikjum Barcelona-liðsins.

"Það kemur að því að hann meiðist illa. Upp á síðkastið er hann sparkaður niður um leið og hann snertir boltann," sagði Guardiola á blaðamannafundi en það er mjög erfitt að stoppa Messi þegar hann er kominn á ferðina.

"Það er skylda dómara að verja leikmenn fyrir svona árásum. Það á ekki bara við Messi heldur alla leikmenn," sagði Guardiola sem er greinilega ekki sama lengur um móttökurnar sem Messi er að fá í leikjum.

Messi sem er aðeins 21 árs gamall hefur leikið frábærlega með Barcelona í vetur og er sem dæmi búinn að skora 17 mörk í 22 leikjum í spænsku deildinni.