FIA menn fúlir á móti FOTA

Ekkert hefur þróast í átt að samkomulagi milli FIA, alþjóðabílasambandsins og FOTA, samtökum keppnisliða. FIA sendi frá sér yfirlýsingu í morgun þar sem segir að sambandið hafi ekki náð samkomulagi við samtök keppnisliða varðandi útgjaldaþak né heldur hugmyndir að reglum fyrir næsta ár.

Í yfirlýsingu FIA segir að reglurnar sem sambandið hefur sett fram um 40 miljón punda útgjaldaþak muni því standa óbreytt, en keppnislið höfðu hugmyndir um að lækka útgjöld skref fyrir skref næstu árin. Stærstu liðin kost til liðlega 300 miljónum punda á ári og því ber mikið í milli. Fjölmörg Formúlu 1lið hafa hótað að hætta í Formúlu 1 og jafnvel stofna eigin mótaröð. Málsaðilar hittust í Lundúnum í gær, en allt kom fyrir ekki.

Yfirlýsing FIA í dag mun ekki bæta ástand mála, en sambandið hefur gefið 8 Formúlu 1 liðum innnan FOTA færi á að sækja um keppnisrétt 2010 fyrir 19. júní. Að öðrum kosti eiga þau á hættu að falla úr leik, þar sem 15 nýjar umsóknir bárust til FIA og aðeins 13 lið verða á ráslínu á næsta ári.

Liðin 8 innan FOTA sóttu sameiginlega um að keppa og mynduðu þannig þrýstihóp, en Force India og Williams höfðu áður gengið úr skaftinu og sótt um þátttöku sem einstök lið.

Mótið á Silverstone brautinni í Bretlandi um næstu helgi verður svanasöngur mótshalds á brautinni í Formúlu 1 og spurning hvert stefnir í íþróttinni með endalausum deilum um fyrirkomulagið á næsta ári.