Fjögur lið yfir hundrað stigin í Subwaybikarnum

Iceland Express deildarliðin Grindavík, Breiðablik, Njarðvík og Keflavík unnu öll góða sigra í sextán liða úrslitum Subwaybikars karla í dag. Grindavík vann Ármann 132-76, Breiðablik vann 102-58 sigur á ÍBV, Njarðvíkingar unnu UMFH 107-55 á Flúðum og Keflavík vann 100-90 sigur á Val á Hlíðarenda.

Páll Axel Vilbergsson var með 28 stig á 18 mínútum í 132-76 sigri Grindavíkur á 1.deildarliði Ármanns en Guðlaugur Eyjólfsson skoraði 18 stig og Darrell Flake var með 17 stig. John Davis skoraði 31 stig fyrir Ármann.

Sæmundur Oddsson skoraði 27 stig og Arnar Pétursson var með 15 stig í 102-58 sigri Blika á ÍBV í Smáranum. Kristján Tómasson skoraði 24 stig fyrir Eyjamenn.

Kristján Rúnar Sigurðsson var með 20 stig og Guðmundur Jónsson skoraði 19 stig í 107-55 sigri Njarðvíkur á UMFH á Flúðum. Mate Dalmay skoraði 20 stig fyrir Hrunamenn.