Ribery: Ég vil fara til Real

Franck Ribery segir að hann vilji fara frá Bayern München og að ekkert annað komi til greina hjá honum en að fara til Real Madrid.

Hann hefur undanfarna mánuði einnig verið sterklega orðaður við Manchester United sem og önnur lið. Hann hefur sagst vera ánægður hjá Bayern en nú sé hann búinn að ákveða sig.

„Ég vil fara. Það verður Real eða ekki neitt," sagði hann í samtali við franska fjölmiðla. „Ég mun núna bíða og sjá hvernig málin þróast og svo mun ég ræða við forráðamenn Bayern."

Uli Höness, framkvæmdarstjóri Bayern, sagði þetta engu breyta.

„Fulltrúar Real vildu koma til München en við sögðum þeim að spara sér flugmiðana því það væri tilgangslaust. Við þurfum ekki á þeirra peningum að halda og munum halda Franck sama hvað tautar og raular."