Hannes í banni í fallslagnum

Hannes Þ. Sigurðsson verður í banni þegar Íslendingaliðin GIF Sundsvall og Norrköping mætast í botnslag sænsku úrvalsdeildarinnar.

Sænska úrvalsdeildin er reyndar komin í frí vegna Evrópumótsins í knattspyrnu sem hefst í næsta mánuði. Leikur Norrköping og Sundsvall fer fram í byrjun júlímánaðar.

Hannes fékk sitt þriðja gula spjald á leiktíðinni er Sundsvall vann 2-1 sigur á Malmö í gær. Hannes lagði upp sigurmark leiksins.

Hannes hefur verið í byrjunarliði Sundsvall í öllum ellefu leikjum liðsins á tímabilinu og skorað í þeim fjögur mörk. Sundsvall er nú í næstsíðasta sæti deildarinnar, stigi á undan Norrköping.

Auk Hannesar leika með Sundsvall þeir Sverrir Garðarsson og Ari Freyr Skúlason. Garðar Gunnlaugsson og Gunnar Þór Gunnarsson leika með Norrköping.