Veigar skoraði í jafntefli Stabæk

Veigar Páll Gunnarsson skoraði mark Stabæk sem gerði jafntefli, 1-1, gegn Lyn í norsku úrvalsdeildinni í dag. Veigar Páll skoraði fyrsta mark leiksins á 57. mínútu en Lyn jafnaði á þeirri 65. með marki frá Gustavino og þar við sat.

Miðað við textalýsingu á Verdens Gang virtist Veigar Páll vera allt í öllu hjá Stabæk og var margsinnis nálægt því að skora. Pálmi Rafn Pálmason kom inn á sem varamaður á 78. mínútu í liði Stabæk en Indriði Sigurðsson spilaði allan leikinn í vörn Lyn.

Stabæk er í efsta sæti norsku úrvalsdeildarinnar með 38 stig, fimm stigum meira en Fredrikstad sem á einn leik til góða. Lyn er í fjórða sætinu, tíu stigum á eftir Stabæk.