Pálmi Rafn skoraði í sínum fyrsta leik með Stabæk

Pálmi Rafn Pálmason skoraði mark í sínum fyrsta leik í búningi Stabæk í gærkvöldi er varalið félagsins vann 4-2 sigur á varaliði Strömsgodset.

Pálmi fékk ekki að spila með Stabæk gegn Bödo/Glimt á sunnudaginn er liðin mættust í norsku úrvalsdeildinni um helgina en hann fékk að sýna sig og sanna með varaliðinu.

Hann skoraði úr víti og kom þar með Stabæk í 3-2 forystu. Þjálfari varaliðsins sagði að Pálmi hefði staðið sig vel.

„Hann fær örugglega tækifæri gegn Rosenborg (annað kvöld). Þeir stóðu sig vel í kvöld og sýndu að þeir hafa mikið fram að færa í aðalliðinu."

Sjálfur sagði Pálmi að það hefði verið gaman að skora, eins og alltaf. „Ég er klár í slaginn í úrvalsdeildinni. Ég er í góðu formi en tók eftir því að leikurinn er aðeins hraðari en því sem ég er vanur," sagði Pálmi Rafn.