Segir starfskjör Lárusar Welding eðlileg

Þorsteinn Már Baldvinsson, stjórnarformaður Glitnis, segir að þau kjör sem Lárusi Welding voru boðin þegar hann var ráðinn séu í samræmi við það sem tíðkaðist við gerð sambærilegra samninga hjá fjármálafyrirtækjum á þeim tíma.

Segir hann að ljóst hafi verið að vandasamt yrði að fylla skarð Bjarna Ármannssonar og þegar Lárus varð fyrir valinu, þá starfaði hann sem framkvæmdastjóri Landsbankans í London. Hafði hann á þeim tíma áunnið sér tiltekin starfskjör og réttindi sem hann gaf frá sér þegar hann skipti um starfsvettvang.

Þetta kemur fram í svari Þorsteins við fyrirspurnum sem Vilhjálmur Bjarnason, framkvæmdastjóri Samtaka fjárfesta, setti fram á aðalfundi Glinis 20. febrúar síðastliðinn.

Þorsteinn tekur þó fram að samningar af þessu tagi verði ekki gerðir á meðan hann gegni starfi stjórnarformanns í bankanum þótt þeir hafi tíðkast fram til þessa í starfsemi fjármálafyrirtækja.

Varðandi kaupréttasamninga sem stjórn Glitnis gerir segir Þorsteinn að stjórn bankans hafi einungis gert kaupréttarsamning við forstjóra félagsins en gerð annarra kaupréttarsamninga sé ekki í höndum stjórnar.

Stjórn félagsins samþykkti 30. maí 2007 kaupréttarstefnu vegna þess sem eftir lifði ársins 2007 og ársins 2008. Samkvæmt henni var heimilt að gera kaupréttarsamninga fyrir allt að 550 milljónir hluta við lykilstarfsmenn í bankanum. Var miðað við lokagengi hlutabréfa í Glitni 29. maí sem var þá 27,5 krónur á hvern hlut. Meginreglan sé sú að kaupréttargengi sé lokagengi síðasta dags fyrir undirritun samnings.

Jafnframt tekur Þorsteinn fram að unnið sé að því um þessar mundir, í samstarfi við lykilstjórnendur, að breyta núverandi fyrirkomulagi og fella niður þá kauprétti sem nú eru í gildi. Segir hann að unnið sé að nýju fyrirkomulagi og hafi Félag fjárfesta hugmyndir um efni hvatakerfis fyrir stjórnendur sé hann reiðubúinn til viðræðna um það efni.