Brown kallar bankastjóra á fund

Gordon Brown forsætisráðherra Bretlands hefur boðað yfirmenn helstu banka og lánafyrirtækja á sérstakan fund í Downingstræti. Erindið er versnandi ástand á húsnæðismarkaði og hvernig hægt er að hjálpa húseigendum að komast í gegnum lánsfjárkreppuna.

Forsætisráðherrann boðaði hópinn á morgunverðarfund næstkomandi þriðjudag áður en hann fer í heimsókn til Bandaríkjanna. Þar verður lánsfjárkreppan á alþjóðamarkaði helsta umræðuefnið.

Stærstu lánsfjáraðilar í Bretlandi eiga svo fund með Alistair Darling fjármálaráðherra til að finna leiðir að hjálpa til við að auðvelda stöðuna.

Seðlabanki landsins lækkaði grunnvexti í síðustu viku, í þriðja sinn frá því í desember. En sérfræðingar hafa spáð því að lántökukostnaður haldi áfram að hækka þrátt fyrir það.

Brown skrifaði í breska dagblaðið News of the World að Darling myndi ræða nýjar leiðir til að tryggja að lágir vextir væru í boði fyrir húsnæðiseigendur.

Og forsætisráðherrann fór fram á að helstu fjármálastofnanir ynnu saman til að tryggja að mögulegum vandamálum framtíðarinnar yrði ekki haldið leyndum.

Hann skrifaði; „Þrátt fyrir að Seðlabankinn hafði lækkað vexti á síðustu mánuðum hafa bankar ekki alltaf látið neytendur njóta þess."

Þá sagði Brown að seðlabankinn hefði dælt 15 milljörðum punda inná markaðinn.