Baulað á Isiah Thomas í sigri New York

Isiah Thomas, þjálfari New York Knicks, þurfti að hlusta á nokkuð baul frá áhorfendum í Madison Square Garden í nótt þegar hans menn lögðu Boston 94-87 í æfingaleik.

Zach Randolph skoraði 23 stig fyrir New York og Nate Robinson 20 fyrir heimamenn, en Paul Pierce var bestur hjá Boston með 29 stig, Kevin Garnett 17 stig og 10 fráköst og Ray Allen skoraði 12 stig.

Nokkrir af ársmiðahöfum Knicks voru þarna mættir á sinn fyrsta leik í vetur og bauluðu margir þeirra á Isiah Thomas þjálfara. Hann var fyrir nokkru dæmdur sekur um að hafa áreitt fyrrum starfsmann félagsins kynferðislega.

Þá vann Atlanta 103-99 sigur á Washington í nótt þar sem Josh Smith og Marvin Williams skoruðu 24 stig hvor fyrir Atlanta, en liðið hefur unnið 6 af 7 leikjum sínum til þessa á undirbúningstímabilinu - það mesta síðan 1995. Gilbert Arenas var stigahæstur hjá Washington með 19 stig.