Hugarfarið er lykillinn að velgengni Messi

Hollenska knattspyrnugoðsögnin Johan Cruyff segir að einstakt hugarfar sé lykillinn að frábærri frammistöðu miðjumannsins Leo Messi hjá Barcelona í haust.

Cruff skrifar vikulegan pistil í Katalóníublaðið El Periódico og fór þar fögrum orðum um argentínska undrabarnið. "Leo hefur allt sem til þarf til að verða stjórstjarna, en það sem gerir hann sérstakan er að hann er staðráðinn í að verða sá besti og það er það sem keyrir hann áfram," sagði Cruyff.

"Það er fullt af leikmönnum þarna úti sem vinna mjög vel og leggja hart að sér, en það sem sker þá bestu úr er hugarfar þeirra og innsta eðli. Menn geta reynt að bæta sig eins og þeir geta - en þetta sérstaka hugarfar er eitthvað sem ekki er hægt að kenna," sagði Cruyff.