Nýr forstjóri Eimskips á Íslandi

Guðmundur Davíðsson hefur verið ráðinn forstjóri yfir starfsemi Eimskips á Íslandi En Bragi Þór Marinósson verður forstjóri yfir Norður-Atlantshafssvæði félagsins. Í tilkynningu frá félaginu segir að ráðningin sé til komin vegna skipulagsbreytinga en gífurlegur vöxtur Eimskips á undanförnum mánuðum hafi kallað á að Norður-Atlantshafssvæði félagsins verði skipt í tvennt.

Haft er eftir Baldri Guðnasyni, forstjóra Hf. Eimskipafélags Íslands, í tilkynningu að félagið hafi tekið gríðarlegum breytingum á skömmum tíma. Félagið hafi starfsemi í yfir 30 löndum og séu starfsmenn nú um 14.500 talsins. Til samanburðar þá voru starfsmenn rétt um 1.200 fyrir

3 árum. „Mikilvægt er að huga vel að starfseminni hér á Íslandi sem og

annarsstaðar og er það meginmarkmiðið með þessari breytingu," segir hann.

Nýr forstjóri yfir starfsemi Eimskips á Íslandi mun einbeita sér að rekstri og þróun á starfsemi Eimskips á Íslandi enda er sú starfsemi mjög mikilvæg í rekstri félagsins.

Forstjóri Norður-Atlantshafssvæðis mun fást við frekari uppbyggingu á svæðinu fyrir utan Ísland, einkum í Færeyjum og Noregi.

Guðmundur P. Davíðsson hefur áralanga reynslu af stjórnun fyrirtækja ásamt því að hafa setið í stjórnum margra félaga. Hann starfaði nú síðast sem framkvæmdastjóri Fjárfestingafélagsins Grettis. Hann var þar áður forstöðumaður markaðsmála og vöruþróunar á fyrirtækjasviði Landsbankans á árunum 2003-2007 en var þar áður hjá SIF á árabilinu 2000 til 2003.

Bragi Þór Marinósson hefur gengt stöðu framkvæmdastjóra

Norður-Atlantshafssvæðis frá árinu 2006. Þar áður var hann framkvæmdastjóri alþjóðasviðs Eimskips 2004-2006 og framkvæmdastjóri dótturfélaga Eimskips í Hollandi og Belgíu 1999-2004, að því er fram kemur í tilkynningu Eimskips.