LME skoðar yfirtöku á Stork-samstæðunni

Marel hefur hug á að kaupa allt hlutafé hollensku iðnsamsteypunnar Stork en ekki einungis matvælavélavinnsluhluta hennar. Þetta kom fram á hluthafafundi í Stork sem fram fór í dag. Maarten Muller, lögmaðurinn LME eignarhaldsfélags, sem Marel á fimmtungshlut í á móti Eyri Invest og Landsbankanum, sagði félagið skoða alla möguleika og væri yfirtökutilboð einn þeirra.

LME hefur aukið hratt við hlut sinn í Stork og fer nú með rúm 32 prósent hlutabréfa í samstæðunni. Félagið, sem hefur frá því í fyrra leitast eftir því að kaupa matvælavinnsluvélahluta Stork, hefur frá upphafi verið mótfallið 1,5 milljarða evra yfirtökutilboði breska fjárfestingasjóðsins Candover í samstæðuna. Tilboðið jafngildir 47 evrum á hlut eða rúmum 133 milljörðum íslenskra króna. Gengið hefur hækkað nokkuð síðan það var lagt fram í júní en stendur nú í 47,49 evrum á hlut.

Að sögn fréttastofu Reuters er yfirtökutilboðs frá LME og Marel í Stork ekki að vænta fyrr en eftir 4. september næstkomandi en þá rennur tilboð Candover út.

Ætla má að miðað við gengi Stork í dag nemi markaðsverðmæti hlutar LME í félaginu rúmum 43 milljörðum íslenskra króna.